Терактіде қаза болған сержанттың отбасына Алматы облысынан пәтер берілді

Алматы облысының әкімі Амандық Баталов 18 шілдедегі терактіде қаза болған сержант Мақсат Сәлімбаевты жерлеу рәсімінде болды. Өңір басшысы қаза тапқандардың туыстары мен жақындарына көңіл айтты. Дереккөз: Bnews.kz

0
Мақсат Сәлімбаев

Жерлеу рәсімі Жамбыл ауданының Қарақыстақ ауылында болды. Сондай-ақ мұнда еске алу және аза тұту митингі өтті.

Өз сөзінде облыс әкімі Амандық Баталов марқұмның ерлігі Отанға деген адалдық пен патриотизмнің жарқын үлгісі болғанын атап өтті.

«Жас Мақсат тәуелсіз елінің тірегі, қорғаны еді, ол өз ерлігімен бейбіт тұрғындардың өмірін құтқарды. Мақсат секілді батырлардың есімі тәуелсіз еліміздің тарихында алтын әріптермен жазылары хақ», – деді облыс әкімі.

Қарулы қақтығыстан кейін Елбасы барлық мемлекеттік органдарға, өңір басшыларына нақты тапсырма берген болатын. Мақсат Сәлімбаевтың отбасына Қарасай ауданындағы «Асыл Арман» тұрғын үй кешенінен екі бөлмелі пәтер бөлу туралы шешім қабылданды.

«Әрине, бұл қазаның орнын толтырмайды, дегенмен өмір бір орнында тұрмайды, балаларына, жақындары мен туыстарына ұзақ өмір тілейміз», – деп толықтырды А.Баталов.

Естеріңізге сала кетейік, 18 шілдеде ҚР ІІМ басшысы Қалмұханбет Қасымов оқиғаның егжей-тегжейін айтып берді.

Атыс кезінде 3 полицей, 1 шекарашы және 1 тұрғын қаза тапты. 6 полицей мен 3 тұрғын жараланды. Кеше тағы бір полицей ауруханада көз жұмғаны хабарланды.

Сайтта мәтіннен қате таптыңыз ба? Мәтінді белгілеп, Ctrl+Enter пернелерін басыңыз!

Пікір қосу

Қалдыратын пікіріңізді осында жазыңыз!
Есіміңізді жазыңыз!