ЭКСПО-ның басты ғимаратын «Жерұйық» деп атауды ұсынамын

ЭКСПО-ның басты ғимаратын "Әлем шары" немесе "Нұрлы әлем" деп атаудан гөрі "Жерұйық" деп атауды ұсынамын. Жерұйық - Асан қайғы бабамыз армандаған мекен - деп журналист Нұрсерік Жолбарыс Фейсбуктағы өз парақшасында жазды.

3

ЭКСПО-ның басты ғимаратын «Әлем шары» немесе «Нұрлы әлем» деп атаудан гөрі «Жерұйық» деп атауды ұсынамын. Жерұйық — Асан қайғы бабамыз армандаған мекен. Жерұйық сөзінің мағынасы жәннат, киелі мекен дегенге де келеді.

Асан қайғы бабамыз Есіл өзенін көргенде: «Алты күнде ат семіртіп мінетін жер екен», — депті. Елбасымыз бір сөзінде «Біз Жерұйықты таптық. Біздің Жерұйығымыз — Астана» деген болатын.

Біле білсек, Асан қайғы қазақ мемлекетінің географиялық картасын жасап берген алғашқы адам. Оның Жерұйықты іздеп жүріп, жырына қоспаған жері жоқ. Сол жыры арқылы халқы өз жерін терең біліп таныды.

Асан қайғының “Жерұйығы” стратегиялық маңызға да ие. Жерұйық шұрайлы қоныс қана емес, елін, жұртын сыртқы жаулардан қорғайтын жол, жаңа қоғамның үлгісі, қазақ халқын тарих сахнасында сақтап қалу бағдарламасы екенін зерттеушілер айтып жүр.
Тәуелсіз Қазақстанның жерұйығы — Астана. Бүкіл қазақтың бет бұратын киелі мекені де осы. Ендеше, Астанадағы халықаралық деңгейдегі жаңа ғимаратты «Жерұйық» деп атауға әбден болады. Менің бұл ұсынысым Елбасының мемлекетімізді Ұлы Дала елі деп атау туралы бастамасымен толығымен сəйкес келеді.

Мұхтар Әуезов, Әлкей Марғұлан тәрізді ғұламаларымыз Асан қайғыны «ХV ғасырда қазақ ұлысын біріктіру мәселесін қолына алған даланың ойшыл данасы» деп бағалаған. Астарына үңілсек, Президентіміздің саясатымен, халқымыздың ұлы мұратымен үндеседі. Осы атау арқылы біз тарихымыздың тереңде екенін де көрсете аламыз. Ендігі жерде көпшіліктің қолдауы керек. Ұсыныс жасап, ел болып осы атауға қол жеткізейік, ағайын!

Сайтта мәтіннен қате таптыңыз ба? Мәтінді белгілеп, Ctrl+Enter пернелерін басыңыз!

Пікір қосу

3 пікір

  1. Асан қайғы бабаларымыз Оңтүстікке келіп ат басын тіреген кезде Түлкібас ауданын көріп, былай деген екен- шыбық лақтырсаң зәулім тал өсетін топырағы майдай «жер жаннаты майлыкент» деген екен. Осы Түлкібас атауынан атын ауыстырып Майлыкент деп қою керек деген ұсыныс тастаймын.

    Түлкібастың мағынасы жоқ, ол түлкіге де байланысты емес, Түркі басы болып аталған ежелде, бірақ оны қытай тарихшыларының жазбаларында «Р» әрпі жоқ болуының себебінен Түлкібас болып жазылып солай аталып кеткен екен.

Пікір қосу