Бас прокуратура митингке қатысқандардың қылмыстық жауапкершiлiкке тартылатынын ескертті

Қазақстанның Бас прокуратурасы жанындағы заңдылықты қамтамасыз ету бойынша консультативтiк кеңестiң отырысында Бас прокурор Жақып Асанов жер мәселесiне қатысты ел азаматтарына ресми үндеу жасады. Дереккөз: BNews.kz

3
Жақып Асанов

Ол халықты қоғамдық тұрақтылықты сақтау үшiн арандатуға бой бермеуге, азаматтық ұстаным мен жауапкершiлiк танытуға шақырып, заңсыз митингке шақырғандар, оны ұйымдастырғандар және қатысқандар әкiмшiлiк, қылмыстық жауапкершiлiкке тартылатынын ескерттi, деп хабарлайды BNews.kz.

«Заңсыз митингтердi болдырмау үшiн олардың алдын аламыз деп прокуратура органдары ең алдымен түсiндiру жұмыстарын өте қатты күшейттiк. Бесiншi мамырға дейiн бiрде-бiр адам жауапкершiлiкке тартылған жоқ. «Алдын алайық, түсiндiрейiк, көндiрейiк, сендiрейiк» деп бар күшiмiздi осы жұмысқа жұмсадық. Мемлекет басшысы мораторий жариялады, арнайы комиссия құрылды. Бiрақ, осыған қарамастан кейбiреулер жердi сылтау қылып, халықтың тыныштығын, елдiң осындай өмiрiн бұзып отыр. Сондықтан осы мүмкiндiктi пайдаланып, ресми үндеу жасауға рұқсат етiңiздер», – дейдi Асанов.

Бас прокурор жер мәселесiне қатысты кез-келген пiкiр бiлдiру үшiн барлық жағдай жасалғанын, соған қарамастан, кейбір адамдар ұлтаралық араздықты қоздыру үшiн жалған ақпарат әдейi таратып жатқанын айтты.

«ҚР Президентiнiң 2016 жылғы 6 мамырдағы Жарлығымен Жер кодексiнiң кейбiр нормаларын қолдануға мораторий жарияланды. Мемлекет басшысының тапсырмасымен Жер реформасына қатысты комиссия құрылды. Оның құрамына азаматтық қоғам институттарының басшылары мен белсендiлерi кiрдi. Азаматтар комиссия жұмысына өңiрлерде құрылған қоғамдық кеңестер арқылы да қатыса алады. Комиссия отырысында пiкiр алмасу барынша ашық. Оның қызметi ақпарат құралдарында тұрақты жарияланып отырады. Арнайы ашылған Jerturaly.kz сайтында қазақстандықтар өз сұрақтарын комиссияға қойып, ұсыныс-тiлектерiн бере алады. Бiр сөзбен айтқанда, жер мәселесiне қатысты кез-келген пiкiр бiлдiру үшiн барлық жағдай жасалған. Алайда, кейбiр адамдар осындай жағдай мен заң талаптарын елемей, ортақ диалогтан қашып, халықты заңсыз қарсылық акцияларға шақырып отыр. Әлеуметтiк ұлтаралық араздықты қоздыру үшiн жалған ақпарат әдейi таратылып жатыр. Мұндай әрекеттер ҚР заңдарына қайшы келедi”, – дейді Жақып Асанов.

Сонымен қатар, прокурор қоғамдық тұрақтылықты сақтау үшiн ел азаматтарынан мұндай арандатуға бой бермеуге шақырды.

“Осыған байланысты қоғамдық тұрақтылықты сақтау үшiн ел азаматтарынан мұндай арандатуға бой бермеуге, азаматтық ұстаным мен жауапкершiлiк танытуға шақырамын. Прокуратура туралы заңның 25-бабын басшылыққа алып, заңсыз митингке шақыру, оны ұйымдастыру, тiптi, оған қатысудың өзi әкiмшiлiк немесе қылмыстық жауапкершiлiкке әкеп соғатынын ескертемiн. Құқық қорғау органдары кез келген заңбұзушылықтың жолын кесiп, қылмыстық қудалауға дейiн заңда көзделген шараларды дереу қабылдауға мiндеттi”, – деп үндеу тастады Бас прокурор.

Сайтта мәтіннен қате таптыңыз ба? Мәтінді белгілеп, Ctrl+Enter пернелерін басыңыз!

3 пікір

  1. Ертең мамырдың 21-і. Атойлап алаңға шығамыз деген бауырларым болса күштерін басқа күнге сақтауын өтінемін. Әйтпесе,басында жер дауынан басталған мәселенің бағыты қазір қатты өзгеріп кетті. Мүйіз сұраған тоқал ешкі сақалынан айрылғанын білесіздер ғой.
    Біздің әуелгі ойымыз не еді? Үнімізді қандай жолмен болса да жоғарыға жеткізту болатын. Біз сол миссиямызды орындадық. Мараторий берілді,комиссия құрылды. Ол комиссияның шешімі қандай болатынын,заң қандай өзгеріспен қайта күшіне енетінін әзірге білмейміз. Ол сол жердегі бізден эстафетаны қабылдап алғандардың еншісінде. Сондықтан дәл қазір алаңға шығудың еш маңызы жоқ.
    Ертең алаңға шығып,содан кейін біздерге біз батыр да сен қатын деп айтушы болмаңдар. Біз қал-қадіріміз жеткенше өз қарсылығымызды жеткіздік. Жұмыс істедік. Сол кезде тізе қоссаңыздар қайда қалдыңыздар. Мені танымайтын айдалада вахтада жүрген балалар арнайы келіп жолығып кетіп отырды. Сондықтан,осы шулы мәселе көтерілгенде 3-4 жігіт бұғып қалмай қатты жұмыс істедік. Мараторий мен жер комиссиясының құрылуына иненің көзіндей болса да әсерімізді тигіздік. Енді,біздің істің берекесін алмаңыздар.
    Қайталап айтамын. Митинг өз бағытын өзгертті және ол бізге қажет емес.

  2. бірдеңе бүлдірмесе, біреуді балағаттамаса неге жауапқа тартылады? Отан үшін, болашақ үшін шырылдаған азаматтар неге жазықты болады? азаматтар нан тауып бер демесе, ақша бер демесе, мемлекет мүддесін, ел мүддесін көздесе неге айыпты?

  3. сонда не істеу керек,,ал,жоғарыдағылар құлақ аспаса ше? қалай дәлелдеу керексонда Бас прокорор мырза?Шетелдерде ашықтан -ашық шығып жатыр,бірақ соған ешкім тиісіп жатқан жоқ қой..ал бізде басқаша ,,қалай сонда…

Пікір қосу