«Дайдидау» әнін жарты әлем тыңдайтын болды

Ақтөбелік әнші Димаш Құдайбергеннің орындауындағы халық әні «Дайдидау» әлемдік радио жүйесіне енгізілді. Бұл не деген сөз? Бұл Димаштың орындауындағы әнді халықаралық радио жүйесіндегі жүздеген елдің тұрғындары тыңдай алады деген сөз. Дереккөз: Ақтөбе

0

Бұл сүйінші хабарды бізге Қазақстан Республикасының мәдениет қайраткері Қанат Айтбаев жеткізді. Қ.Айтбаевтың айтуынша, халықаралық радио өкілдері «Қазақ» радиосына ұсыныспен шығып, қазақ халқының ұлттық болмысын көрсететін ән сұраған.

— Бізге хат кеш жеткен болуы керек, әлде бір жерде кідіріп қалды ма, әйтеуір, бұл жақсы хабарды бізге Лев Гумилев атындағы Еуразиялық ұлттық университетінде қызмет етіп жатқан жастар жеткізді. Аталған университетте жұмыс істейтін Ұшқын Сайдрахман деген жігіт халықаралық Евро радиосына бір ән ұсынуымызды сұрады. Оған Малайзиядағы Азия-Тынық мұхиты хабар тарату одағы штаб-квартирасының қызметкері Нұрзада Күмісбек қолқа салыпты. Ұшқын қажетті құжаттарды шет тілінде толтырып, соның көмегімен Димаш Құдайбергеннің орындауындағы халық әні «Дайдидауды» ұсындық. Ән барлық талаптарға сай келген. Әлібек Дінішевтің орындауындағы халық әні «Ақбақайды» ұсыну туралы да пікірлер болды. Дегенмен ойласа келе «Дайдидауды» жіберуді жөн көрдік, — дейді «Қазақ» радиосының «Алтын қорының» музыкалық редакторы Гауһар Қозыбаева.

Мәселенің мәні былай: 13 ақпан — Халықаралық радио күні. Бұл күнді тойлау 2011 жылы ЮНЕСКО-ның шешімі бойынша қабылданған және 2012 жылы алғаш рет атап өтілген. Осы мерекеге байланысты Европа хабар тарату одағы мен Азия Тынық мұхиты хабар тарату одағы биыл халықаралық Евро радиосының арнасында «80 минутта барлық әлем» атты іс-шара ұйымдастырмақ. Бұл шара барысында радио желісінен осы хабар тарату желілеріне мүше елдердің барлығының сол елдің мәдениеті мен болмысынан хабар беретін ұлттық әндері шырқалатын болады. Сол әндер қатарына биыл тұңғыш рет қазақ әні енгізілді: Димаштың орындауындағы «Дайдидау»!
Қанат Айтбаевтың айтуынша, Димаштың орындауындағы бұл ән белгілі аранжировщик Бақытбек Зейнеловтің өңдеуінде жіберілді. Википедия еркін-энциклопедияға сенсек, Европа хабар тарату одағы мүшелігінде Еуропа, Солтүстік Африка және Таяу Шығыстағы 56 елдің 72 компаниясы, ал Азия-Тынық мұхиты хабар тарату одағында Азия-Тынық мұхиты аумағының 57 еліндегі 72 компания бар. Екі одақтың әлеуетті аудиториясы кемінде 4 миллиард адам. Бұл Димаштың орындауындағы қазақтың халық әнін жарты әлем тыңдайды деген сөз.

Айтпақшы, Қанат Айтбаев тағы бір жақсы жаңалықпен бөлісті. Көктемде Димаш Түркі мәдениетін және өнерін дамыту халықаралық ұйымының мұрындық болуымен АҚШ-тың Вашингтон, Нью-Йорк қалаларында өткізілетін шараларға ресми шақырту алған.

Сайтта мәтіннен қате таптыңыз ба? Мәтінді белгілеп, Ctrl+Enter пернелерін басыңыз!

Пікір қосу