Динара Сұлтан: Балаларым қазақша оқып, қазақ мектебін бітірсе екен деймін

Әнші Динара Сұлтан Comode.kz сайтына сұхбат беріп, өз жанкүйерлерін мазалаған сұрақтарға жауап берді. Дереккөз: Comode.kz

2
Динара Сұлтан

– Динара, соңғы кезде сіздің сырт келбетіңіз қатты өзгеріп кетті дейді. Super Starжобасындағы Динараға мүлдем ұқсамайсыз. Кейбір адамдар тіпті сізді танымай қалыпжатыр.

– Адам өмір бойы өзгермей, бір қалыпта қалмайды ғой. Бұл заңдылық. Сондай-ақ сырт келбетімнің өзгеруіне ана болу да өз үлесін қосқан шығар. Сонымен қатар, Super Star жобасында түріміздің өзгеше болғаны бет бояуына да байланысты болды деп ойлаймын. Жалпы, ол кезде сырт келбетімізді барынша өзгертуге тырысты: шашты қиды, бояды, бетімізге де қабат-қабат бояу жақты. Қазір, әрине, мен шашымды боямаймын да, қимаймын да. Былайша айтқанда, табиғи сұлулық (күледі).

SBB_9962

– Әйтеуір, пластикалық ота жасатқаның жоқсыз ғой?

– Жоқ (күледі)! Қайдағы пластика? Жасым енді 29 толады. Шыны керек, көп нәрсе спорт пен дұрыс тамақтануға байланысты.

 – Төртінші сәбиіңізге жүкті екеніңізді білеміз. Қашан босанасыз?

– Осы айдың аяғы,болмаса, келесі айдың басы, Алла жазса.

– Алғашқы баланы неше жасыңызда дүниеге әкелдіңіз?

– 23 жасымда. Өзім 21 жасымда тұрмысқа шықтым.

 – Жұбайыңызбен қалай таныстыңыз?

– Білесіздер ғой, мен отбасым жайлы көп айтқанды ұнатпаймын. Сондықтан, жолдасыммен өнер жолында таныстым деп, қысқа қайыра салайын.

SBB_2167

 – Отбасыңызбен Біріккен Араб Әмірліктеріне неге кетіп қалдыңыз?

– Екінші қызым туылғаннан кейін, күйеуім жұмыс бабымен Дубайға кетуі керек еді. Сөйтіп, біз уақытша Дубайға көштік.

 – Демек, алдағы уақытта Алматыға қайта ораласыз ғой?

– Қазақстанға ораламыз. Ол Алматы ма, Астана ма – әлі белгісіз. Жалпы жыл сайын “биыл қайтамыз” деп жоспарласақ та, болмай жатыр. Мүмкін, келесі жылы қайтармыз, кім біледі?

 – Өзіңіз Қазақстанға қайтқыңыз келеді ме? Мұнда дағдарыс, күн сайын девальвация.Адамдар қайта елден кетудің амалын ойластырып жатыр.

– Ия, оның барлығын естіп жатырмыз. Бірақ, туған жеріміз сол ғой. Жалпы, біз Қазақстанда жиі болып тұрамыз. Жаз бойы сонда болдық, желтоқсан айын толығымен Қазақстанда өткіздік. Балаларымызға да ұнайды. Олар қазақ тілінде ғана сөйлейді.

 – Ағылшын, араб тілдерінде ше?

– Ағылшынша және қазақша сөйлейді. Араб тілін онша білмейді. Жалпы менің үлкен бір арманым – балаларым қазақша оқып, қазақ мектебін бітірсе екен деймін.

 – Қазақстанда мектеп қарастырып қойдыңыз ба?

– Белгілі бір мектепті таңдадым деп айта алмаймын. Басты шарт – оқу қазақ тілінде жүргізілу керек. Ағылшын тілін біледі, әлі де оқиды. Орысшаны былай-ақ үйреніп алады.

 – Арабтар балаларын қалай тәрбиелейді? Айырмашылық көп па?

– Мен байқаған басты айырмашылық: олар бала жыласа, біз сияқты жүгіріп барып оны көтеріп, жұбатпайды. Біз ғой, баланы өзіміз көтере беріп, сосын қолдан түспейді деп жүреміз. Ал арабтар баланы көп қолға ала бермейді. Тіпті құлап қалса да, өзі тұрып, жүре береді. Мүмкін, ол арабтардың көп бала туатынына да байланысты шығар. Бір отбасында әдетте 4-5 бала.

 – Өз балаларыңыз туралы айтып берсеңіз?

– Үлкен қызым Сурая 6-да. Мектепке 4 жастан бастап барды. Осы жердің оқу жүйесі басқа. Біздің балалар 1-ші сыныпта оқитын нәрселерді ағылшын әдістемесі бойынша 4 жастан бастап үйренеді: әліппе, жазу. Қазір болса, кітап оқиды. Екінші қызым Сара 3-те. Оған француз және ағылшын тілді балабақшаны таңдадық. Оның енді басы қатып жүр: балабақшада бірде француз, бірде ағылшын тілінде сөйлесе, үйде қазақша (күледі). Жақында, Алла жазса, 4-ке толады, ол да мектеп бағдарламасына көшеді. Ал кіші қызымыз үйде, ол 2 жас 6 айда. Біздің еркеміз. Есімі Иман. Жалпы, қыздар тілді араластырып сөйлегендіктен, қызық-қызық нәрселер айтады. Мысалы: “мынаны аш” деудің орнына “this one аш” дейді. Немесе, жоғарыға қарай нұсқап “қара up” дейді. “Мен мектепке барғанда” дегенді “When мен мектепке барғанда” деп араластырады. Басында қатты мән беретінбіз. Қазір үйреніп кеттік.

Сайтта мәтіннен қате таптыңыз ба? Мәтінді белгілеп, Ctrl+Enter пернелерін басыңыз!

2 пікір

  1. тагыда балдарымды казак мектебине бергим келеди дид отирик сайрамашы,биз негизи сорлы халыкпызгой баска тилде сойлегенди мактаныш санайтын.

Пікір қосу