Зейнетақы жинағы тиімді жұмсалып жатыр — Ұлттық банк төрағасы

ҚР Ұлттық банк төрағасы Данияр Ақышев Бiрыңғай жинақтаушы зейнетақы қорының қаражаты тиiмдi жұмсалып жатқанына сендiрiп отыр. Бұл туралы ол Мәжiлiстiң жалпы отырысында айтты.

Дереккөз: Bnews.kz
0
зейнетақы теңге тиын ақша

«Былтыр Бiрыңғай жинақтаушы зейнетақы қорының қаражатын инвестициялау бойынша шешiм қабылдау процесiне айтарлықтай өзгерiстер енгiзiлдi. Инвестициялаудың негiзгi бағыттарын қазiр Мемлекет басшысы басқаратын Ұлттық қорды басқару кеңесi ұсынады. Яғни, зейнетақы қорының қаражаты қайда бағытталатыны бойынша негiзгi шешiмдердi осындай деңгейге шығарамыз. Тиiсiнше бұл мәселеге үлкен жауапкершiлiкпен қараймыз. Бiрiншi кезекте, қаржының сақталуы, салымның сенiмдiлiгi қамтамасыз етiледi. Одан кейiн барып салынған қаражаттың табыс әкелуiне көңiл бөлемiз», — дейдi Данияр Ақышев.

Оның айтуынша, қазiргi уақытта Ұлттық банктiң Бiрыңғай жинақтау зейнетақы қорын басқару бойынша барлық операциялары ашық және қолжетiмдi. Зейнетақы қоры өз инвестициялық декларациясын тұрақты түрде жариялайды, осылайша қор инвестициялайтын бар қаражатты әркiм көру мүмкiндiгiне ие.

«Екiншiден, қазiргi ставкалар нарықтық көрсеткiшке жақын, тiптi кейде жоғары. Тиiсiнше бұл Бiрыңғай жинақтаушы зейнетақы қорының жоғары табыстылығын қамтамасыз етедi. 2016 жылдың бiрiншi жартыжылдығында қордың табысы инфляция деңгейiн айтарлықтай басып озды. Ақшаны қайтару мәселесiне келсек, қазiрi уақытта барлық инвестиция сенiмдi. Бүгiнде зейнетақы активтерiн басқару саясаты тиiмдi деп есептеймiн», — деп сендiрдi Ұлттық банк төрағасы.

 

Сайтта мәтіннен қате таптыңыз ба? Мәтінді белгілеп, Ctrl+Enter пернелерін басыңыз!

Өз пікіріңізді қосыңыз

avatar
wpDiscuz